شاهد شاف كل حاجة:الانصار يا ولدى مسكوا الخواجه تكو وضبحوا شخخخخخ..

[أمير الشعراني]

*- بذّكر في واحد من الأنصار سكَّ ليهو عسكري، العسكري تلّ جوّه البحر، الأنصاري تلّب وراهو، لليوم الليله ما مرقو.
*- ختوني مع 14 زول في زنزانة ضيقة خلاص، لو عاوزين نتقلب نقول للزول الأول اتقلب.. بعدين كلنا ننقلب.
[frame="7 80"]

يتوكأ على عصا غليظة، اصبحت له رجلاً ثالثة، بعد ان وهن العظم واشتعل الرأس شيبا، (92) عاما تآمرت على عنفوان البطل عبد الرحمن احمد الزين، احد قادة احداث مارس 1954م؛ تلك المظاهرة المشهورة التى سيرها انصار حزب الأمة نكاية فى قدوم الرئيس محمد نجيب الذى قيل وقتها انه يتأبط مشروعا لوحدة السودان مع مصر، والبطل عبد الرحمن كان والده من اقرب ثلاثة رجال الى قلب السيد عبد الرحمن المهدي المفطور فى الوطن واستقلاله، وقد قال فيهم: (ثلاثة بريدن كان رادونى بريدن وكان ما رادونى بريدن) وهم عبد الله ود جاد الله (كسار قلم مكميك) والأمير ود نوباوى وأحمد الزين -والد عبد الرحمن- الذى كان خزنة مونة الأنصار بعد احداث الشكابة وقتل أولاد المهدي باستثناء السيد عبد الرحمن الذى كان أصغرهم سنا.
والبطل عبد الرحمن المولود فى العام 1916 كان من المسؤولين عن تأمين مظاهرة مارس، بجانب قيادته للبوكس (فورد) موديل 46 الخاص به والذي يتقدم المظاهرة وعلى كاهله مكرفون يردد هتافات تنادي بـ(السودان للسودانيين)... (عاش السودان حراً مستقلاً) و(يا قوم لا استعمار بعد اليوم) مصحوبا بدقات النحاس اللاهبة من على ظهر البوكس، ومن خلفه صفوف متراصة من الأنصار قدرها بأكثر من عشرين ألفا، كالجنود الفاتحين، يرتدون جلابية الأنصار الشهيرة (على الله) وعلى رؤوسهم عمامات مسدلة على اكتافهم يقال لها (عذبة)، لم يكن فى نية الأنصار عنف مكتوم حتى انهم جمعوا اسلحتهم البيضاء فى مخالي (جمع مخلاة) وأودعت فى دار الصحف الاستقلالية، غرب زنك الخضار سابقاً، متجهين بموكبهم نحو المطار، وفى موكبهم رسالة يريدون توصيلها الى الرئيس المصرى محمد نجيب ومن كان فى ركبه، ولكن الموكب تم اعتراضه... وبعد داك عينك ما تشوف الا الدم.
سألت العم عبد الرحمن مستفزا خلايا ذاكرته للعودة بعجلة الزمان الى اربعة وخمسين عاما للوارء، وقد نجحت...
*- انتو خططتو كيف لإخراج المظاهرة؟
- نحن قبل عشرة ايام من الزيارة الكانت لافتتاح البرلمان، قررنا مقابلة الناس الجاية للافتتاح وعلى رأسهم الرئيس المصري محمد نجيب والضيوف المعاه باستقبالات شعبية كبيرة لإظهار قوة التيار الاستقلالي، وما نخلي الاتحادين ينفردوا بالزيارة.
فبدينا اجتماعات بقيادة الأمير نقد الله، وحضرنا لاستقبال الأنصار الجايين من الأقاليم في حوش كبير جنب الإسطبلات، وجهزنا اكلهم وشرابهم.
*- أها وبعد داك..؟
- اها قمنا اتنظمنا، ما نحن عندنا نظام لربط الصفوف، النظام دا زي حق العساكر، ببدأ بالمجموعة وبكون فيها 8 افراد، وعندها ريس، وكل اربع مجموعات بعملوا فرقة، وبكون عندها ريس بمشي بجانب الطابور، وكل 3 فرق برؤساء بعملوا مئة.
- وفي يوم الزيارة –الأول من مارس- قمنا من الدغش اتحركنا بنظامنا داك، ومشينا على المطار.. وكنا في الشارع قاعدين نردد في شعارات الاستقلال، وناس الشارع بقولوا معانا برضو. ونحن ماشين في نظام ما عندنا اي نية سوء.. لمن وصلنا بوابة المطار، اعترضونا، وقالوا لينا ما بتمروا.
*- الحصل شنو بعد الاعتراض..؟
- وقت نحن ما بنتحاجج مع العساكر في المطار، كلمونا بى تحت تحت انو الاتحاديين هربوا محمد نجيب ودوه القصر بشارع النيل..
*- عملتو شنو..؟
- اتحركنا مشينا على القصر لمن وصلنا المكان الفيهو وزارة المالية هسع اعترضتنا قوة من العسكر فيها حكمدار انجليزي ومعاه زي 30 عسكري وقالوا لينا يا تتفرقوا يا نضربكم..!
*- اتفرقتو..؟
- قال وهو يبتسم ساخراً من السؤال: نحنا أنصار المهدى ما بنخاف البنادق والرصاص، رفضنا نتفرق او نتراجع، فانهال علينا الرصاص من فوق بناية وزارة المالية حاليا ومن القوة المعترضة، الأنصار يا ولدى مسكوا الخواجة تكو وضبحوا شخخخخخ.. وارتجل شاعر من الحلاويين ما بذّكر هسّي اسمو قصيدة بدايتها بتقول:
لُكها يا كريم
بدّل نداها سخانة
حكاما الصقور
والأرض جبخانة
الرصاص المنهمر على المظاهرة خرب النظام العاملنو، فجاطت الأمور، خاصة انو في قيادات بتاعت فرق ماتوا زي ود عثمان صالح. وبذّكر في واحد من الأنصار سكَّ ليهو عسكري، العسكري تلّب جوّه البحر، الأنصاري تلّب وراهو، لليوم الليله ما مرقو.
*- (بشوق وترقب سألتو): وبعد داك..؟
- بدينا في نقل المصابين بالبوكس بتاعي دا، وبوكس تاني حق امير انصار مدني محمد نقد الله.. والمستشفي اليوم داك إتملت بالناس، لمن رقدوا الناس في الواطة. وبرضو البوليس اعتقل ناس كتار.
*- انت اعتقلوك..؟
- انا لما رجعت بالليل وقفت البوكس في بيتنا بحي ود ارو بأم درمان، وبيّت بره البيت، الصباح العساكر جُو البيت واتحفظو على البوكس، وسألوا مني.. ناس البيت قالوا لي ما تجي، وحقو تسافر بره الخرطوم. لكن انا راسي قوي ابيت ما اسافر. وكمان مشيت للقسم وقلت ليهم ادوني البوكس بتاعي. قاموا قالوا لي: وين انت؟ نحن بنفتش عليك، وقبضوني، وختوني مع 14 زول في زنزانة ضيقة خلاص، كنا لو عاوزين نتقلب بالليل، نقول للزول الأول اتقلب.. بعدين كلنا ننقلب.
وبذّكر من الناس الكانو معاي في الزنزانة الشيخ مصطفى الأمين، عوض صالح، عبداللطيف صالح، وعثمان احمد دفع الله... كنا قاعدين نتواصل مع الناس البره بعمود الأكل البجينا كل يوم، كنا بنكتب فيه بعد الأكل الرسائل.
عددنا كان كبير جدا، عشان كده حققوا معانا بسرعة بواسطة محقق انجليزي، فتمت تبرئتي مع الكثيرين وتم اطلاق سراحي بعد اسبوع من الحبس.. لكن ما فكوا لي البوكس.
*- ورجعت البوكس كيف..؟
- مرقت من الحراسة مشيت سراية السيد عبد الرحمن كان هناك اظن اجتماع للقيادات الحزب، فلقيت عبدالرحمن علي طه، الشنقيطي، امين التوم، عبدالله خليل، والمحجوب، وآخرين ما بتذكرهم. لمن جيت الجماعة قالوا لي انت ما تمشي تكلم عبد الله خليل بقصة البوكس، مشيت ليهو وكلمتو، كتب ورقة صغيرة لعناية حكمدار الخرطوم (ابوشرا) وختاها في ظرف. وصلت الظرف لأبوشرا قرأ الخطاب، وكتب للقسم (اطلقوا سراح البوكس).
*-.....؟
- جاتنا تعليمات بتهريب الأنصار الجوا للمظاهرة خارج العاصمة، بعد الأوضاع الأمنية ما اتعقدت. فذهبنا لموقف اللواري، ولقينا السواقين خايفين، لكن قدرت اقنعهم، والتزمت ليهم بدفع القروش، وكانت علاقاتي بيهم كويسة.
بعد ما طلعنا الأنصار خارج العاصمة، بدينا في تفقد الناس الهنا والقيادات.[/frame]
[align=left] حوار: محمد عبد العزيز[/align]

[فتحي مسعد حنفي]

الابن أمير وينك غايبأحداث مارس من الأشياء التي لا يمكن أن تنمحي من الذاكرة فقد كنت في العاشرة من العمر وأخذنا والدي بالسيارة لنري محمد نجيب والزعماء الأزهري ومن معه..
كان وسط الخرطوم مكتظا بالبشر وأعداد كثيرة من أصحاب العزبات كما قلت..وأذكر انه قد جاء أحدهم تجاه السيارة ونظر الي والدي وقال له: الليلة نجيبكم فسا(من فسوة) والشر ينطق من عينيه..الوالدة أحست بالخطر فقالت لوالدي الذي يشبه الخواجات :ياراجل مرقنا من هنا0.وأعتقد ان لباس والدتي للثوب السوداني هو الذي أنقذنا في ذاك اليوم لأهم علموا بأن والدي ليس خواجة.
الشاهد رأينا بالقرب منا أحد الجنود واقفا وبجانبه أحد الأنصار وفجأة وبدون أي انذار هتف الأنصاري ألله أكبر ولله الحمد ثم أخرج فرارا من بين طيات ملابسه ونزل به علي كتف الجندي بقرب رأسه فشقه كما تشق عظام الخروف المعلق بعد الذبح ..وهنا بدأ الهرج وانطلقت القنابل المسيلة للدموع وصوت الرصاص يلعلع والأنصار كانوا يتقافذون الي النيل بعد استعمال الجنود للذخيرة الحية..وأذكر حكاية سمعتها بعد الأحداث وهي أن الأنصار قالوا عند استعمال القنابل المسيلة للدموع: الله أكبر سيدي قلبها شطة وبعد سقوط أول مصاب منهم بالرصاص قال أحدهم: ألحق سيدي سها
بعد ذلك بدأت حملة المطاردات اللا انسانية وتم قتل الكثير من الأنصار بدون سبب وأذكر ان أحدهم قد أطلق عليه الرصاص وهو علي شجرة في الخرطوم بحري يعني بعيدا عن الأحداث...
أما حكاية جمع الأسلحة في مخالي فهذا ليس حقيقي بدليل ما حكاه الرجل نفسه فكيف كانوا غير مسلحين وكيف أخرج أحدهم سكين ذبح بها الخواجةثم ان أعلامهم التي كانو يحملونها كانت مثبتة علي رأس الحراب لاخفائها وعندما بدأ القتال رموا الأعلام وأشهروا الحراب..
يا عزيزي يا أمير جاء الأنصار في ذاك اليوم لقتل محمد نجيب وليس للتظاهر ضد الوحدة كما يقولون...أي نعم كانوا ضد الوحدة وكانو يسعون لافشالها وبالفعل كان خطاب اعلان الوحدة معدا وجاهزا لاعلانه في خطاب الزعيم الأزهري ولكن حال دون اعلانه ما حدث في ذلك اليوم فهم كانوا يعلمون ان قتل محمد نجيب كان سيشعل الحرب بين مصر والسودان وسيلغي مشروع الوحدة الي الأبد..
لك تحياتي

[خالد الحاج]

هذا الرجل يا أمير "تأريخ يمشي علي قدمين"
التحية لك وللأستاذ محمد عبد العزيز
ليتك أضفت صور يا أمير حتى لو كلفتك مشوار تاني.
أما زولك التلب ورا الخواجة فيظهر أنه نفسهم طوييييييل خلاص

[خالد الحاج]

المشاركة الأصلية كتبت بواسطة فتحي مسعد حنفي

الابن أمير وينك غايبأحداث مارس من الأشياء التي لا يمكن أن تنمحي من الذاكرة فقد كنت في العاشرة من العمر وأخذنا والدي بالسيارة لنري محمد نجيب والزعماء الأزهري ومن معه..
كان وسط الخرطوم مكتظا بالبشر وأعداد كثيرة من أصحاب العزبات كما قلت..وأذكر انه قد جاء أحدهم تجاه السيارة ونظر الي والدي وقال له: الليلة نجيبكم فسا(من فسوة) والشر ينطق من عينيه..الوالدة أحست بالخطر فقالت لوالدي الذي يشبه الخواجات :ياراجل مرقنا من هنا0.وأعتقد ان لباس والدتي للثوب السوداني هو الذي أنقذنا في ذاك اليوم لأهم علموا بأن والدي ليس خواجة.
الشاهد رأينا بالقرب منا أحد الجنود واقفا وبجانبه أحد الأنصار وفجأة وبدون أي انذار هتف الأنصاري ألله أكبر ولله الحمد ثم أخرج فرارا من بين طيات ملابسه ونزل به علي كتف الجندي بقرب رأسه فشقه كما تشق عظام الخروف المعلق بعد الذبح ..وهنا بدأ الهرج وانطلقت القنابل المسيلة للدموع وصوت الرصاص يلعلع والأنصار كانوا يتقافذون الي النيل بعد استعمال الجنود للذخيرة الحية..وأذكر حكاية سمعتها بعد الأحداث وهي أن الأنصار قالوا عند استعمال القنابل المسيلة للدموع: الله أكبر سيدي قلبها شطة وبعد سقوط أول مصاب منهم بالرصاص قال أحدهم: ألحق سيدي سها
بعد ذلك بدأت حملة المطاردات اللا انسانية وتم قتل الكثير من الأنصار بدون سبب وأذكر ان أحدهم قد أطلق عليه الرصاص وهو علي شجرة في الخرطوم بحري يعني بعيدا عن الأحداث...
أما حكاية جمع الأسلحة في مخالي فهذا ليس حقيقي بدليل ما حكاه الرجل نفسه فكيف كانوا غير مسلحين وكيف أخرج أحدهم سكين ذبح بها الخواجةثم ان أعلامهم التي كانو يحملونها كانت مثبتة علي رأس الحراب لاخفائها وعندما بدأ القتال رموا الأعلام وأشهروا الحراب..
يا عزيزي يا أمير جاء الأنصار في ذاك اليوم لقتل محمد نجيب وليس للتظاهر ضد الوحدة كما يقولون...أي نعم كانوا ضد الوحدة وكانو يسعون لافشالها وبالفعل كان خطاب اعلان الوحدة معدا وجاهزا لاعلانه في خطاب الزعيم الأزهري ولكن حال دون اعلانه ما حدث في ذلك اليوم فهم كانوا يعلمون ان قتل محمد نجيب كان سيشعل الحرب بين مصر والسودان وسيلغي مشروع الوحدة الي الأبد..
لك تحياتي

للتوثيق بس...
فتحي مسعد ده باكر ما يجي يعمل قدرنا وكده...
الزول أتاريه قديييييييييييييييييم

[فتحي مسعد حنفي]

المشاركة الأصلية كتبت بواسطة خالد الحاج

للتوثيق بس...
فتحي مسعد ده باكر ما يجي يعمل قدرنا وكده...
الزول أتاريه قديييييييييييييييييم

توثيق شنو ياخالد أنا متين نكرت سني بل بالعكس أنا مستمتع باحترام الناس الأصغر مني ولابد ورا الكبر دا ساعة الحارة..وأنا الأجبرت الجكس يقولوا لي عمو لكن امشي شوف ناس حسن فرح الجبنا اعترافاتهم بالدردقة..قال متزوج ليهو 45 سنة يعني بعد شوية ما بعيد تعملوا لينا منبر خاص تسموهو منبر المعاشات لكن حندخل في مشكلة منو اليرأسو ( العملية حسابيا بسيطة ..أنا مولود في 4 مارس 1944 والأحداث كانت في مارس 1954 يعني عشرة سنين بالتمام والكمال وخمسة وخميسة زي ما المصريين بيقولوا وعيني باردة يا خال

[عادل عسوم]

ياأبوأحمد أنشاالله عمر مديد وصحة حديد ...
تعرف أنت راجل متصالح مع نفسك عشان كدة مليان عطاء للكل...
وبعدين صدقني يافتحي كتاباتك ومداخلاتك في المنتدى ...كانت واحدة من الأشياء الشدتنا للمنتدى وخلتنا نجي عليكم
يعني بأختصار ياخال في الأحصائية تزيدو لي فتحي صوت في خانة الدعوات الى الغير
دمت دوما بخير ياغالي
والتحية لأمير الشعراني ...ولي عودة بحول الله

[Hassan Farah]

يا فتحى سعد بالله اتاريك مبارينا من حوادث مارس 54--
اولا ما تجننا-- اما خلاص- قلنا اكبر منك ب سنه--تخيل يازول انا برضو ذهبت مع اخى المرحوم عمر وشفنا محمد نجيب-- كان واقف فى شرفة القصر المقابلة لوزارة المالية---وفجأة ظهرت جموع الانصار-- شايلين فراريرهم من جهة شارع الجامعة حيث كان يقف غردون على جمله ودخلوا على الناس المتجمعين بين المالية والقصر والنيل ووقعوا فى الناس ضرب ومن طرف-- حتى ابنهم ود عثمان صالح دبحوهوا --تصدق يا اخى قريبنا- وداعة عثمان رحمة الله يرحمو كان معاهم ورفع فرارو على عمر اخى حتى صاح فيه عمر- وداعة انت جنيت ---وداعة ابيض زي الخواجه والدتهم من اصل تركى من عائلة المهندس وابوهو رباطابى انصاري===اما العسكرى الوقع فى النيل اظنو الصول ابو شنبا روب ولا اظنه كان هاربا انما دفعت به الجموع دفعا--الهربنا نحن-- والله لم اتوقف الا عند القهوة التى بجوار جامع فاروق-----

[فتحي مسعد حنفي]

المشاركة الأصلية كتبت بواسطة adilassoom

ياأبوأحمد أنشاالله عمر مديد وصحة حديد ...
تعرف أنت راجل متصالح مع نفسك عشان كدة مليان عطاء للكل...
وبعدين صدقني يافتحي كتاباتك ومداخلاتك في المنتدى ...كانت واحدة من الأشياء الشدتنا للمنتدى وخلتنا نجي عليكم
يعني بأختصار ياخال في الأحصائية تزيدو لي فتحي صوت في خانة الدعوات الى الغير
دمت دوما بخير ياغالي
والتحية لأمير الشعراني ...ولي عودة بحول الله

أللع يجبر بي خاطرك ياعادل وصدقني أنا كم مرة فكرت أبطل كتابة لكن وجود الناس الزيك كان دايما بيخليني أرجع في قراري بس ياخ متصالح دي ما كان تخليها صالح ساكت عشان راسي يكبر

[فتحي مسعد حنفي]

لله

المشاركة الأصلية كتبت بواسطة Hassan Farah

يا فتحى سعد بالله اتاريك مبارينا من حوادث مارس 54--
اولا ما تجننا-- اما خلاص- قلنا اكبر منك ب سنه--تخيل يازول انا برضو ذهبت مع اخى المرحوم عمر وشفنا محمد نجيب-- كان واقف فى شرفة القصر المقابلة لوزارة المالية---وفجأة ظهرت جموع الانصار-- شايلين فراريرهم من جهة شارع الجامعة حيث كان يقف غردون على جمله ودخلوا على الناس المتجمعين بين المالية والقصر والنيل ووقعوا فى الناس ضرب ومن طرف-- حتى ابنهم ود عثمان صالح دبحوهوا --تصدق يا اخى قريبنا- وداعة عثمان رحمة الله يرحمو كان معاهم ورفع فرارو على عمر اخى حتى صاح فيه عمر- وداعة انت جنيت ---وداعة ابيض زي الخواجه والدتهم من اصل تركى من عائلة المهندس وابوهو رباطابى انصاري===اما العسكرى الوقع فى النيل اظنو الصول ابو شنبا روب ولا اظنه كان هاربا انما دفعت به الجموع دفعا--الهربنا نحن-- والله لم اتوقف الا عند القهوة التى بجوار جامع فاروق-----

ياحسن أفتكر حقو بعد ما الاتنين وقفنا قدام بعض عرايا زي في حمامات الداخلية في أوروبا حقو نربط الكفاح ونكون جبهة هيئات بدل الطقيع في بعض
الحمدلله انت كنت هناك وحضرت الحاصل وشفت بي عينك وما حكوا ليك ويجي زول انصاري عمرو 92 سنة يقول ختوا السلاح في مخالي..أها دا راجل مخرف وللا لأ والخال الشاب خالد يقول ليك تاريخ يمشي علي قدمين والتاريخ دا اكيد جابوا من الكراع التالتة اليتعكز عليها ودا للعلم من أكبر مساوئ الأنصار وقصدي طبعا التعصب الأعمي والدفاع عن الخطأ بالكذب وتزوير التاريخ علي العلم هم ما محتاجين لأنهم ناس سودانيين بيحبوا البلد بس باسلوب البلد بلدنا واحنا اسيادا والشكية لي ألله ياخالد

[Hassan Farah]

خلاص يا فتحى--اقترح ةنكوون فرقة سرية داخل المنبر نسميها فرقة العجايز المتصابية ونفتح باب التسجيل---عندك مرشحين---
لكن خلينا فى الجد عمنا دا فعلا خرف-- الجماعة ديل جووا هاجمين على الناس وسلاحهم فوق رؤوسهم يرقش تحت الشمس-- الناس ديل عبوهم من الجزيرة ابا لكتلة الخرطوم وجوا ناس موت وان كل الجموع التى فى الساحة هم اعدإ ويجب قتلهم-- سلاح شنو الكان مخبأ فى الجرابى-- هذا محض كذب وهكذا سالت الدمإ فى الخرطوم--وبالمناسبة فى تلك الايام كانت تحدث المصادمات بين شباب الانصار وشباب الختمية-- يعنى كانت هناك مليشيات لكنها غير مسلحة بسلاح نارى--الدم فعلا سال فى اول مارس 54 وكان مخطط له-- لا تلعبوا على عقولنا ىا قوم--

[خالد الحاج]

البوست ده بجيب الشبهة
سلامو عليكم

[عادل عسوم]

ياخال... أنا بس دخلت وقلت لي كلمة لي فتحي...تقوم تلمنا مع الجماعة؟

[مكي محمد الحسن]

الاخ امير الشعراني
والاخوة المتداخلين
السلام عليكم ... توثيق التاريخ وحفظه مهم جداً للاجيال ( صحيح انا ما من جيل تلك الاحداث لانني من مواليد منتصف الستينيات ) ولكنني استمتع بقراءة التاريخ ...حدثت في ذات مرة الخال المرحوم ابوالقاسم هاشم ( 25 مايو وهو من الناصريين في ذلك المجلس العسكري قائلاً له يا خال انت ما تكتب مذكراتك ؟؟ لانه فيها تاريخ يوم لابد من الرجوع اليه ..خاصة وانه المكتبة السودلنية تخلوا من التوثيق المحكي ..أجابني قائلاً : الكلام العاوزوا انت عني كمذكرات بتلقاهوا في الونسة التوثيق ده كلام تاني ما عندنا ليهو زمن ؟ .. ثم توفي بعدها بعام ..كان ذلك في القاهرة في شقة المرحوم عصمت حسن زولفو والحمد لله انه قد وثق لمعركة كرري .
ما قصدت ايصاله هو انه بقراءة ما جاء علي لسان عبد الرحمن المولود فى العام 1916 والذي كان من المسؤولين عن تأمين مظاهرة مارس وبمداخلات السادة فتحي مسعد حنفي وحسن فرح كشهود عيان ومن قراءتنا كا تحاديين ديمقراطيين لتلك الاحداث ..تنجلي حقيقة ذلك التوجس الذي لازم علاقة الانصار وحزب الامة بالشقيقة مصر والذي ما انفرجت اساريره الا في منتصف التسعينيات وبوجود السيد الصادق المهدي مقيماً بمصر.

[بابكر مخير]

الإبن أمير
عجبي
عرستا قريب وزوج ومسئوليات وزوجة وبرضك بتلاحق الخبارات وتوثقها وبتجيب جميلها وجديدا
ربنا يغطيك ويحفظك

يا دفعة سلام، أكان ود الخال حسن فرح ولا الحبيب فتحي ولا العجوز فهم وما عمر "خلود" ومكي "من إسمك دا ياكا دفعة"

كدي يا فتحي خت الرحمن في قلبك، كنا في اليوم داك في الخرطوم وكان عمري في وكتا؛ 8 سنوات (مع العلم أني ما ناقش ذي الشيطون فتحي) ما أفتكر بتذكر التفاصيل الدقيقة ولا كنت في قامة الحبان فتحي وود الخال حسن (قاماتهم طويلة بالعظمة) لكن في سن العشرة و8 قطع شك إلا يكونو محمولين على الأكتاف عشان يشوفو الحاصل.
المهم
الحكاية الفيها عنعنة بتدخل فيها حكاوي وحكايات وزيادات
كلم احمد عمر وكلم عمر إسحق وكلم إسحق جبريل وهلما جرا

[Hassan Farah]

المشاركة الأصلية كتبت بواسطة Babiker Mukhayer

الإبن أمير
عجبي
عرستا قريب وزوج ومسئوليات وزوجة وبرضك بتلاحق الخبارات وتوثقها وبتجيب جميلها وجديدا
ربنا يغطيك ويحفظك

يا دفعة سلام، أكان ود الخال حسن فرح ولا الحبيب فتحي ولا العجوز فهم وما عمر "خلود" ومكي "من إسمك دا ياكا دفعة"

كدي يا فتحي خت الرحمن في قلبك، كنا في اليوم داك في الخرطوم وكان عمري في وكتا؛ 8 سنوات (مع العلم أني ما ناقش ذي الشيطون فتحي) ما أفتكر بتذكر التفاصيل الدقيقة ولا كنت في قامة الحبان فتحي وود الخال حسن (قاماتهم طويلة بالعظمة) لكن في سن العشرة و8 قطع شك إلا يكونو محمولين على الأكتاف عشان يشوفو الحاصل.
المهم
الحكاية الفيها عنعنة بتدخل فيها حكاوي وحكايات وزيادات
كلم احمد عمر وكلم عمر إسحق وكلم إسحق جبريل وهلما جرا

الحبيب بابكر مخير نهارك سعيد--اولا وقبل كل كلام ندعوك انا وود دفعتك للانضمام لفرقة العجايز المتصابية --
ثانيا انت قلت اليوم داك كنت هناك برضو---الوداك شنو--برضك حبيت تشوف محمد نجيب---اما نحن فكنا متشعبطين فى الشجر--مين الكان متوقع المصايب دى تحصل----