التغزل بالأكتاف عند شعراء السودان

[الجيلى أحمد]

شكرا ياعم جعفر على هذا الغوص العميق
وشكرا للمداخلات الثرية والممتعة

[عكــود]

المشاركة الأصلية كتبت بواسطة احمد زين

طبعا عبدالله محمد خير صاحب التصوير العجيبة

هنا كان ممكن يقول انه معاصمها مكتنزة اي مليانة زي ما نحن بنقول ودي واحدة من السمات المهمة جدا في الجمال
لكن شوف الشاعر هنا ختاها كيف

شفنا التيلة لكن مافي كشكيش
الغوايش تكشكش كيف
اذا كان المعصم مصبوب صب

والعجب العجيب إيدو الملاني غويش

يعني مش ايد مليانة ومتبتبة بس، لا كما بت عز مالين إيديها غوايش دق المسيكاب .

تحياتي أخمد

[النور يوسف محمد]

استاذ جعفر وكالعهد به ما طرق أمراً الا استوفاه

غيران هناك سؤال تفرضه التغيرات الكثيفة والتحولات التي تتري
وتبدل نسق الحياة التي انتظم مسيرة البشر ، التغيرات التى طالت خلجات المشاعر ولم تسلم منه حنى مفردات العشق ،

السؤال هو
هل صار الوصف الحسي والغزل المباشر من ارث الماضي ؟؟
وهل دلفنا الي براحات ( البنت الحديقة ) وفضاءات الرمزية التي لا تقف فى تضاريس الجسد وتعرجاته

تحياتي

[ابرا]

سلام عم جعفر...غايتوا دا بنبري ومازاحي من هنا الا بالبولبس

[بابكر مخير]

عليك الله دآ صاح منك؟؟
تسيبني أتلفت قولتن أشوف ليا فردة من قريب عمري، أتونس معاهو..
جيتن جيت وياها الرفقة الكايسها والحمد لي الله إتلمت

[جعفر بدرى]

أهلا بالكامل
لك التحايا والأشواق
أيوا يا عمدة تتعدد المناطق والساحات، وتختلف السحنات واللهجات ويبقى المزاج السودانى واحدا، إلا من قليل اختلاف فى بعض التفاصيل الدقيقة

ومن الجميل أنك اوردت لنا أمثلة اضافية لوصف الجمال الذى تكشفه الحركة فى الدارة أو السباتة، فتتجلى سافرة للمراقبين (محاسن الممدوح)

فالدابى حين يقول، كما أوردت:
(مسخت عوم البترقص فى جروفه
يا خلايا فجوا لى النشوفا)

فهو يتطلع ال شوفة نفس (الوزة) التى قال فيها ود الرضى:
(حاكى الغيم تمايل يا غالى النفر
قول للوزه غورى فى عينك ضفر)

وعبد الله محمد خير حين يقول:
(شفنا التله لكن
مافى حس كشكيش
والعجب العجيب
ايدا الملانه غويش)

فإنه يعارض العبادى الذى يقول:
(رن فى قلوبنا حجيله تل)

ويعارض شاعر البطانة الذى يقول:
(تلت بكت الخوخ النقرتو دفافه)

والخوخ هو البديل للغويش، وبكاؤه هو ذلك الصوت الذى يحدث عند المشى أو الرقيص فيبدو مثل نقرة الدفوف

وهو يعارض أيضا خليل فرح حين يقول:
(ما بنسى والمجمع حفل
فى الدارة مكلوفة اب نفل
مابنسى حين وقل جفل
فى قلبى وسواس الحفل)

والحفل بكسر الحاء هى زينة المرأة، ووسواسها هو بمثابة بكاء الخوخ عند شاعر البطانة الذى ذكرناه

أخيرا ..
نحن متفقان ان الحديث عن هذا الموضوع ذو شجون متشعبة، ويحتاج لكثير من التدخلات وها قد بدأتها أنت بالفعل فلك الشكر الجزيل

[جعفر بدرى]

المشاركة الأصلية كتبت بواسطة الجيلى أحمد

شكرا ياعم جعفر على هذا الغوص العميق
وشكرا للمداخلات الثرية والممتعة

جيلى القوم
لك التحايا والأشواق
ولك الشكر أيضا على الحضور والمتابعة

[عكــود]

تحياتي أستاذ جعفر،
صادفني المقطع التالي لحسن الدابي فقلت أشاركك والقراء بيهو:

فرهد الفي قريرنا
تاق راونو ري.
فيهو نابشاني الخلوق مالن علي.
جوز عيونو الدابو في السحسح جدي
الكفل والجيد غزال ضاربلو صي
الضمير متل الحجاب طاونو طي
الصدير نتقاتو دي
الخربت علي.
في رقيصو يتاتي مرة يقلبو كي
عارفو ده المازيني عارفو يكاوي في
الخديد شوف تيهو اخدر دابو ني
عارفو ده المازيني كاسر ضلعة في.
هبوا شيلوا الفاتحة يا اهل الكون سويي
انا قاسي علاجي زاد ألمي العلي
بالشكك والريبة ديمة نظرتو لي
خلى قلبي فريسة في مخلب حدي.

الشاعر /حسن الدابي.

[عكــود]

المشاركة الأصلية كتبت بواسطة عكــود

تحياتي أستاذ جعفر،
صادفني المقطع التالي لحسن الدابي فقلت أشاركك والقراء بيهو:

فرهد الفي قريرنا
تاق راونو ري.
فيهو نابشاني الخلوق مالن علي.
جوز عيونو الدابو في السحسح جدي
الكفل والجيد غزال ضاربلو صي
الضمير متل الحجاب طاونو طي
الصدير نتقاتو دي
الخربت علي.
في رقيصو يتاتي مرة يقلبو كي
عارفو ده المازيني عارفو يكاوي في
الخديد شوف تيهو اخدر دابو ني
عارفو ده المازيني كاسر ضلعة في.
هبوا شيلوا الفاتحة يا اهل الكون سويي
انا قاسي علاجي زاد ألمي العلي
بالشكك والريبة ديمة نظرتو لي
خلى قلبي فريسة في مخلب حدي.

الشاعر /حسن الدابي.

الخديد شوف تيهو اخدر دابو ني
يقصد ب تيهو، شلخ حرف ال T على الخد
زي ما قال شاعر آخر، حلو درب الطير في سكينة.
شلخة سكينة كانت درب الطير.

[جعفر بدرى]

شكرا يا نور
على مقدمة تعليقك وإن كانت مفخخة!
وقريبة جدا من حاجة إسمها (الدردقة)!
لكن عفوا فرغم أن السؤال الذى طرحته سؤال مشروع وله علاقة وثيقة جدا بمضمون البوست لكن هناك بعض الأسئلة الواردة قبله مثل:

هل اقتصر جمال الأكتاف فقط على حركة الرقيص؟
فالحردلو حين قال (خرد ومعصرات من شبة الأكتاف) لم يكن المشهد دارة أو حلبة رقيص!

وسؤال آخر:
لماذا دائما يقال للزول الذى ترتفع أكتافه قليلا إلى أعلى، لماذ يقال له تهكما (اب كتيفات)؟!

أما سؤالك الذى استعجلته قليلا:
هل صار الوصف الحسي والغزل المباشر من إرث الماضى؟

فليس هناك من يستطيع أن يقطع بشئ فى ذلك، فالحسية ظلت ملازمة للشعر العربى من بداياته الأولى حتى دولة الأندلس وإلى هذا العصر الحديث الذى ما زال يحتفظ ببعض مظاهرها حتى عند رواد التجديد فى العالم العربى، ونذكر منهم فى السودان المجذوب وصلاح أحمد إبراهيم وحسين بازرعه على سبيل المثال

وسؤالنا لك:
هل انتصرت (البت الحديقة) على (بدور القلعة)؟
أم أن هناك تعادلات ايجابية؟!

[جعفر بدرى]

المشاركة الأصلية كتبت بواسطة ابرا

سلام عم جعفر...غايتوا دا بنبري ومازاحي من هنا الا
بالبولبس

يا ابرا والله غاية الأشواق
بعدين انت ما وش بوليس ياخ
انت تشرف والمكان مكانك
تحياتى والمحبة

[جعفر بدرى]

المشاركة الأصلية كتبت بواسطة بابكر مخير

عليك الله دآ صاح منك؟؟
تسيبني أتلفت قولتن أشوف ليا فردة من قريب عمري، أتونس معاهو..
جيتن جيت وياها الرفقة الكايسها والحمد لي الله إتلمت

بكور حبيبى والله
انت كايس لى وانا افتش فيك وشايفك مشرف من يومين لكن كان عندى بعض الأعطال فى الموبايل لكن الحمد لله والبركة فى الشوفة
كل الأشواق

[جعفر بدرى]

المشاركة الأصلية كتبت بواسطة عكــود

الخديد شوف تيهو اخدر دابو ني
يقصد ب تيهو، شلخ حرف ال T على الخد
زي ما قال شاعر آخر، حلو درب الطير في سكينة.
شلخة سكينة كانت درب الطير.

سلام عمدة
جزيل الشكر عى مشاركاتك الرائعة، وهذه المره بمقاطع لحسن الدابى وهو شاعر غنائى جيد ومعروف ومن الذين عاصروا شعراء الحقيبة وتأثروا بهم، فجاءت اوصافه بديعة التصوير، منسجمة مع حركات السباتة، للصدر والضمير والكفل، هذا الثالوث الأكثر جاذبية والذى حظى بأغلب الوصف من شعراء ذلك الجيل

لكن لنقف قليلا عند المقطع الذى أشرت اليه، الخد الذى تزينه الفصادة:

الخديد شوف تيهو
اخدر دابو نى

ومن الممكن أن يضل القارئ ويأخذ كلمة (تيهو) على أنها من التيه، لكن حسنا فعلت حين تفضلت وفسرته بشكل ال T فى الفصادة

وهى معروفة ف السودان بدرب الطير وأظن أيضا بالواسوق، وقيل فيها شعر كثير وفى الشلوخ بشكل أعم، وهذه بعض النماذج،

التجاني يوسف بشير:
يرف عليه شباب الفنون
وتبرق فى وجنتيه الفصد

ابو صلاح:
الشليخ لى حسنك جلاهو
فى خديدك ما أحلاهو

عبد الرحمن الريح:
فاق السلاح وكسر حديدو
نقرابى فى صفحة خديدو

الطيب ود ضحوية:
قول لى بت عبيد قلبا شديع انحله
من عيدا معاك بقت الكراع منشله
دى الشلاخه أجمل من دكاكر السله
باركيه يتبارك عليك شان الله

ود ضحية يشبه الشلوخ بالسيوف أو الدكاكر، جمع دكرى وهو السيف الصقيل، ودكاكر السلة هى السيوف عند استلالها

عبيد عبد الرحمن أيضا فى مجاراته للخليل فى أغنية (الضواحى) يقول:

بين عيونى وبين انفصادن
يجرى بحر السيف يروح صادن

لكن أنظر لخليل فرح كيف يلمح ولا يصرح ويرمز لدرب الطير فى خد محبوبته:

ليش يا فريعة ما بتجودى بى بلحاية
الطير فى خديدك غلب الحاحايه !!

خالص التحايا

[عكــود]

تحياتي أستاذ جعفر،
مشكور على الإضافة المليانة.

حسب علمي ومشاهدتي، فصدة ال T تختلف عن فصدة درب الطير.
درب الطير أو الواسوق كما تفضلت تتكون من تلات أذرع دقيقة ورقيقة. رأسي متصل بأثنين تحتانيات مميلات على الجوانب، أشبه ما يكون بنبلة مقبضها يكون في الإتجاه الأعلى. فصدة درب الطير مشهورات بها البدويات وهي في غاية الجمال ولا تجدها بين رجالهم. أما فصدة ال T منتشرة بين الرجال والنساء، لكن أكثرها بين الرجال.

على جنب: عند زيارتكم للقرير كنا وقفنا أمام منزل حسن الدابي، رحمه الله، وهي من أجمل المواقع في القرير حيث ملتقى تلاتة حفاير.

[جعفر بدرى]

المشاركة الأصلية كتبت بواسطة عكــود

تحياتي أستاذ جعفر،
مشكور على الإضافة المليانة.

حسب علمي ومشاهدتي، فصدة ال T تختلف عن فصدة درب الطير.
درب الطير أو الواسوق كما تفضلت تتكون من تلات أذرع دقيقة ورقيقة. رأسي متصل بأثنين تحتانيات مميلات على الجوانب، أشبه ما يكون بنبلة مقبضها يكون في الإتجاه الأعلى. فصدة درب الطير مشهورات بها البدويات وهي في غاية الجمال ولا تجدها بين رجالهم. أما فصدة ال T منتشرة بين الرجال والنساء، لكن أكثرها بين الرجال.

على جنب: عند زيارتكم للقرير كنا وقفنا أمام منزل حسن الدابي، رحمه الله، وهو من أجمل المواقع في القرير حيث ملتقى تلاتة حفاير.

سلام عمدة
جزيل الشكر على التصويب وايضاح الفرق بين درب الطير وفصادة حرف T ومعذرة على الخلط والحقيقة أنى ماكنت متأكد عشان كده قدمت كلمة (أظن) وسؤالى الآن عن النقرابى هل هو واحد منهما ام شكل ثالث مختلف

ويا سلام على الصورة وذكريات زيارة القرير فى شلة من شباب سودانيات الجميلين (لا بتتنسى لا
بتنمحى)
خالص التحايا