اقتباس:
المشاركة الأصلية كتبت بواسطة بابكر عباس
هو بالتأكيد الزول القال القصيدة دي و كتب حكاية البنت التي طارت عصافيرها
لما تطلعي في الشوارع
شوفي كيف الناس تصارع
ناس تطفـِّر و ناس تدفـِّر
و في البشابي علي نجومك
و في البخب كايس تخومك
و كل زول من عند سلافك
لا.. لا.. قال دايرلو .. كاس
أول مرة أسمع القصيدة دي، طوالي جات في نافوخي:
حكاية البنت التي طارت عصافيرها....
خرجت من عندها مسرورا، حتى غازلني الناس في الشوارع
|
و الله يا بابكر عباس ما داير أحرف البوست , و كمان أنا بحب بشري الفاضل بشكل جنوني .... لكن بس حصلت حاجة قبل شوية شككتني في نفسي عديل كدا و عليك دينك تجاوبني لانه الموضوع بالنسبة لي حياة و جنون
مداخلتك دا انا شفتها بأم عيني في البوست بتاع مدني تشتعل صح و لا غلط؟
خلاص جهزت الرد و الله لدرجة فيهو تسلم يا شفيف ... بس الا الضيوف البجوا بدون مواعيد ديل واحد دق الباب مشيت قتحت ليه, جيت عملت رفرش للبوست القاه ما في غايتو رأسي هسي مدور في تلاتة سناريوهات
الأول: انا عندي مشكلة و شفت مداخلتك دي في الغيب قبال تكتبها و دا بطلب مني بكرة أخلي الشغل و أمشي أتربط عن أخطر فكي و أكل كسرة بموية لحد ما إتعالج
الثاني: البورد دا يكون مسكون (يعني زول يكتب مداخلة في بوست يجي يلقاها قامت بوست كامل الأركان) و في الحالة دي ناس النور يشيلوا باس ويردهم و يادار ما دخلك شر و كفاية علي شواطين الإنس كمان أشوف واحدين جداد
الثالث: أنت تكون فعلاً كتبت المداخلة في بوست مدني تشتعل و إكتشفت أنها ما مفروض تكون هنا و طوالي شلتها و مسحت الأتر ... عليك دينك السناريو الأخير دا لو صح قول لي بعملوه كيف؟
بس أوعي تقول لي بتعملها الإدارة ... أنا أصلاً مما الله خلقني بكره التعامل مع المدراء بكل أنواعهم
و بالمرة انا مستني اسمع عن بشري الفاضل و أشوف سواقة ناس ضد الريح ديل كيف
ممكن أقبل النصح في الخاص حتي لا أحرف البوست
و شكراً علي الاستجابة مقدماً
