...... ليــــــــــس..إلاّ....

[imported_هيثم علي الشفيع]

(1)

- والكلام دة كووووووولو حصل في الإسبوعين السافرتهم أنا ديل؟؟؟
- تصدقي؟؟؟
- طيب ...وعملت شنو إنتِ بعد داك؟؟؟
- دبرست لي زي خمسة يوم كدة ، وكنت أخدت لي أسبوع أورنيك من الشغل ، واكشفت خلال قعادي مع نفسي في الإسبوع دة إنو الزول دة أصلاً ما كان بيستاهل أضيع زمني معاهو..
- أها..؟؟
- شنو الأها؟؟ رجعت شغلي ، وهسة كل الحاجات عندي رجعت زي الكأنو ما حصل شي..

[imported_هيثم علي الشفيع]

(2)


- آلو...
- .......
- علّي لي صوتِك عشان أنا في المواصلات وما سامع كويس..
- ..........
- ياااااااااااا مرحبا ، إزيك يا سارة ؟؟؟ وين إنتي يا زولة ما ظاهرة اليومين ديل ، لا بتجي الشغل ولا بتفتحي تلفونك عشان يضربوا ليك؟؟؟؟
- .........
- منو؟؟؟ عادل؟؟؟؟ والله أخد إجازتو السنوية يوم الخميس الفات ، وقال الحنة بتاعتو حتكون الأربعاء البعدو في البيت والعرس –كان الله هوّن- الخميس طوالي في الصالة ............
..............دقيقة عليك الله يا فردة......قرصة هنا بالله....
..............أها................قلت لي شنو؟؟؟

[imported_هيثم علي الشفيع]

(3)


- أم الجنيه.....أم الجنييييييييييييييييييييييييييييييه ياخي ،جنيه يعني 100 قرش ، جنية لـــمَّن تركبك
- ياخي ولا تزعلي ياحاجة ، أنا الزول الرسلني ليك أداني ليها مكتوبة وقريتا كدة ، غلطت في البخاري يعني؟؟؟؟
- يا زول ما تكتّر النقة.....عاوز مني شنو؟؟؟
- عاوز أسالك من واحدة عرفتها عن طريق الصدفة وقالوا لي ما بجيب ليك خبرا غير أم الجنيه

[imported_هيثم علي الشفيع]

(4)


- هسة عليك الله سكرتيرتكم الإسمها سارة دي نصيييييييييحة زي باقي الناس وما مجنونة؟؟؟
- مالا؟؟؟ عملتْ شنو؟؟؟؟
- ياخي دي بت عجيبة دي..
يوم داك ، ونحن في الفطور ، إتفتح نقاش عن الجرأة في العلاقات العاطفية ، وكيف إنو البت السودانية دايماً بتكتفي بي دور رد الفعل فيها ، وكيف إنهن ما عندهن الشجاعة للتعبير عن حاجاتن للناس البيحبوهن ، سيبك من باقي الناس الحواليهن...
قام عادل قال : هسة في قعدتنا دي كان سألنا الأولاد عاااااااادي جداً الواحد فينا يكلمنا لو كان مرتبط أو لأ ،ولو حكّيناها معاهو ممكن يورينا إسمها منو ذاتو.....لكن البنات فيهن واحدة بتعمل كدة؟؟؟؟
تقوم زولتك تنط وبي تحدي غريب تقول ليهو : آآآآآآآي بيعملن
قال ليها : خليهن البنات.......إنتي بتحبي؟؟؟؟ قالت ليهو : نعم..........قال ليها : منو؟؟؟
قالت ليو : إنت.........
- وقال ليها شنو الناجح؟؟؟
- وحاتك إبتسم زي العوير وسكت زي الصبّت فوقو مطرة ، وباقي الفطور بقى مدنقر وهي تشيل وتعاين ليهو التقول هو البت وهي الراجل..!!!

[imported_هيثم علي الشفيع]

(5)


- وإنت ياعادل هسة جادي في عرسك لي بت عمك العمرها كلو قاعداهو في الحلة وآخر قراية ليها الثانوي دي؟؟؟
- والغريب في كدة شنو ياخ؟؟ ما سمعت بي "ود العم بيرجّع السيرة"
- ياخ الكلام دة كان في القرن الماضي...إنت متخلف؟؟؟
- يا زول ولا متخلف ولا حاجة ، وأصلاً أنا كايس لي حاجة ترفع لي معنويات أبوي التعبانة اليومين دي ، ولأني عارف إنو الموضوع دة حيفرحّوا شديد ، عملتو........والله ياالصادق ما تتخيل فرح قدر شنو لما قلت ليهو أمشي أخطبا لي..
- طيب يا سيد.........وسارة؟؟؟؟
- سارة مالا؟؟؟
- مالا؟؟؟ إنت بيييييييي عضمة كيبوردك دة قبل كدة ما قلت لي إنك بديت تحبها وإنها برضو شكلها بتستلطفك وإنك بتفتش لي مداخل ليها؟؟؟
- حصل.........بس برضو بي كيبوردي دة قلت ليك البت دي قالت لي بحبك قدام الناس!!!
- ويعني؟؟؟
- ويعني؟؟!!!؟؟؟؟؟ إنت يا الصادق مرقت من البلد دي ليك 10 سنوات ، وماعارف الحاصل فيها شنو....ولا عارف بناتا بقن عاملات كيف!! يا زول إنت جنيت؟؟؟؟ أعرس لي بت قالت لي بحبك هي؟؟؟؟؟

[imported_هيثم علي الشفيع]

(6)


- شوف يا ود أمي ، والله أكان ما الزول الرسلك لي عزييييييز علي ما كنت فتحت خشمي دة معاك......
- خير يا حاجة ، والزول الرسلني ليك دة ورّاك أنا عاوز شنو؟؟؟
- حتكون داير شنو يعني؟؟؟؟ أييييي زول في الحلة دي عاااااااارف أم الجنيه شغالة شنو ، وعااااااااارف ولدا الكبير شغال وين ، عشان كدة ما فيهم زول بيرفع راسو يعاين لي..
- طيب يا حاجة ، أنا بسأل عن زولة إسمها سارة الهادي النور ، ألم فيها كيف؟؟؟
- إتلمّت فوقك صقور يا وسخ يا تافه ، ويكون في علمك يا النضيف وممسح بلا المغتربين كدي إنت.......سارة دي أشرف من الشرف ، وأخلاقا وتربيتا وأسرتا يتوزنوا بالدهب......جاي تقول لي (ألم فيها كيف؟؟)
- ينصر دينك يا حاجة ياخي ، أنا ما مغترب والله ، لكن الزول المرسلني مغترب وليهو 10 سنة من البلد دي وجاي المرة دي عشان يعرّس............................دعواتك.



الجبلين 4/4/2012م

[imported_طارق صديق كانديك]

شكرا ياهيثم

القراءة للحوار تجعل أنفاسنا تتصاعد كأننا نركض خلف الحافلة


سارة زولة جميلة

[imported_واحة]

(كيف!! يا زول إنت جنيت؟؟؟؟ أعرس لي بت قالت لي بحبك هي؟؟؟؟؟)

الاخ هيثم

لك التحية ، ولقلمك كل الاحترام ، كويس انو عرف يحدد بدرى ، واصل

اتتبعك

تسلم

واحة

[محمد حسن الشيخ]

أخي هيثم:

نعم انه حوار متماسك يأخذ بتلابيب النفس ويقطع النفس
نص ايحائي رغم واقعيته التي تكشف عن مفاهيم اخذت تتسيد مواقف الناس

إتلمّت فوقك صقور يا وسخ يا تافه ، ويكون في علمك يا النضيف وممسح بلا المغتربين كدي إنت.......سارة دي أشرف من الشرف ، وأخلاقا وتربيتا وأسرتا يتوزنوا بالدهب......جاي تقول لي (ألم فيها كيف؟؟)

ثم ان التساؤل الحائر عما آلت اليه احوال السكرتيرة زولة إسمها سارة الهادي النور .
هل ذات التي اعرف أم انها الصدفة وتشابه الاسماء.

ثم انه أنا مبسوط منك.

[imported_هيثم علي الشفيع]

المشاركة الأصلية كتبت بواسطة طارق صديق كانديك

القراءة للحوار تجعل أنفاسنا تتصاعد كأننا نركض خلف الحافلة


سارة زولة جميلة

كانديك يااااااااااا ريس

ماك عارف جيتك بي هِني قعَ تجمّني قدر شنو

لا تقطعا خسمّتك بالنبي







____________________
سارة دي ياتا الزولة الجميلة دي؟؟؟ حقت القصة ولاّ بتاعت الكوماج بتاعت سودانيات ديك؟؟؟؟gapgap
أفرز آ ديجانقو

[imported_هيثم علي الشفيع]

المشاركة الأصلية كتبت بواسطة واحة

لك التحية ، ولقلمك كل الاحترام ، كويس انو عرف يحدد بدرى ، واصل

اتتبعك

مرحبتين بالواحة الظليلة

ولَكَمْ يسعدني أن أجد من يقرأني وما أكتب

عظيم تقديري

[imported_هيثم علي الشفيع]

المشاركة الأصلية كتبت بواسطة محمد حسن الشيخ العالم

نعم انه حوار متماسك يأخذ بتلابيب النفس ويقطع النفس
نص ايحائي رغم واقعيته التي تكشف عن مفاهيم اخذت تتسيد مواقف الناس


ثم ان التساؤل الحائر عما آلت اليه احوال السكرتيرة زولة إسمها سارة الهادي النور .
هل ذات التي اعرف أم انها الصدفة وتشابه الاسماء.

ثم انه أنا مبسوط منك.

وأنا أكثر إنبساطاً بقربك مني ومنها -كتاباتي- ياعالم

ويسعدني سماع مثل ما سمعته من أمثالك

صادق المودة والتقدير






_______________
والله دي عوجة دي؟؟؟ قلت لي بتعرف زولة إسمها سارة الهادي النور؟؟؟؟
ياخي سلّم عليها ووصل ليها النص دة

[imported_سارة]

هيثم يا جميل
خلعتنى خلعة السنين قلت متييييييين انا ضربت ليهو ولا كلمته
شكرا لاشراكنا هذه المتعة
محبة قدر الكون دا كلو واكبر بـ كتير

[imported_هيثم علي الشفيع]

المشاركة الأصلية كتبت بواسطة سارة

شكرا لاشراكنا هذه المتعة
محبة قدر الكون دا كلو واكبر بـ كتير

السُرّة كيفنك؟؟؟؟؟

شكراً آلاف لك أيضاً لتواجدك هنا

ويقيني أنك تعلمين أن محبتك ليست من طرف واحد*







___________________
* التعبير أصلاً يخص البروفيسور علي المك من تقديمه لكتاب(حكاية البنت التي طارت عصافيرها)

[imported_Sana Mursi]

هيثم انا راجيه تتم القصه الجميله دي والله وباستمتاع. لكن مسكينه ساره كانت تاكلها في حنانها وتسكت.