يوميات مدرسه بتخاف من المديره
بتخنق من الحته المقفوله ...ادخل الصف اول شي افتحي الشباك يابت واشتغل في امان الله كمان مرات اكون قرفانه والمعلم المفروض يخلي راسو وقلبه بره ويدخل الصف براس وقلب سعيدين حبة التكتح ماتشغلن المهم راسي الناشف دا ادخل الصف وهو مصر يدخل معاي اسلم واقيف مسااافه وبعدين اقول للبنات اقعدي!! والغريبه راسي قاعد اقوم اقول للبنات
بنات!! نمرق بره؟
الفصل بحب الفوضي طبعا يوافقن سعيدات في امان الله نشتغل الحصه ونعود سعداء وتصحبنا اثناء رجوعنا الصف اغنيات ايها الطفل لاتسر وانتظرني لاتبعك جميعا سعداء عدا زول وحيد ..... تنتهي الحصه يرن الهاتف اشوف منو القي المدير في الخط
الو ايوه يااستاذه ومعاها فرحه ماعارفه ليه اشان عارفه بعد ه بكون في شكله وتعالي يااستاذه مها مكتبي
بعد الحصه
لا الاّن
بس الاّن دي تدق في راسي زي الحجر وامشي مسرع الخطوه يمشي ملكا اصل المكتب انتي يااستاذه مش افضل لو البنات ديل اخدو حصتن في الفصل
افضل لمنو
للبنات
وكيف قدرت انه افضل
ماتقدير يااستاذه بس انتي يتحبي تشتغلي بره كتير
طيب وين المشكله ماتغير والتغير من سنن الحياة بعدين المدرس الشاطر يدرس الحصه في اي مكان
بس انتي شايفه انك تقعدي مع البنات في الواطه دا اسلوب حضاري؟
عادي ماقاعده في واطه في فرشه
استاذه مها اوكي امشي مكتبك
واعود وابتسامه عريضه تملا وجهي وراسي يكاد يقع من الضحك وهو يهتف ويقول الحصه الجايه برضو بره!
|
