حد يصحي الجيلي احمد(يوجد حوت)

[عبدالمنعم الطيب حسن]

المشاركة الأصلية كتبت بواسطة وجدي الأسعد الأسعد

محمود دا يا منعم
فعل ما لم تفعله الاحزاب السودانية على بكرة ابيها
في وقت تخلت فيه الاحزاب عن محمد احمد وابنائه
وتركتهم وحدهم في غياهب الانقاذ الضالة المضلة منذ بادية التسعينات وانت ماشي
وحينها كانت الانقاذ تعمل باداء منقطع النظير في جعل السودان نسخة مبكرة لافغانستان
وكان الدفاع الشعبي والخطابات الدينية والجهاد والاستشهاد وزاد المجاهد
وكن بنات الحور حضورا في السودان اكتر من بنات السودان في بت ام روحو
كان الشباب على باب مغسلة دماغ Full Atoumatic
وكان حينها لا يوجد أفق , فقط يا أم جنة عبر الجهاد أو نار بالاضافة لنار عيشة السودان
كان كل شيء يحض ويحرض لعملية الجهاد والاستشهاد
لدرجة انو كل نجوم الفن السوداني أفلت وراحت في غيهب سحيق
وفي تلك الليلة الليلاء برز (قمر) محمود وكان الفنان الوحيد في تلك الحقبة
فاعاد الشباب الى جادة الطريق وارشدهم إلي ان على هذه الارض ما يستحق الحياة
وانو في الدنيا دي في حاجة اسمها قلب وحب ومحبة وسلام
وانه ليس بالسلاح وحده يعيش الانسان
بل بالمحبة
غنا وصدح محمود في ذلك الزمان واطرب الشباب واعادهم الى عصر الحقيبة
فلولا محمود لما خبر شباب اليوم باغاني الحقيبة
وارشدهم الى الفنان العبقري محمد احمد عوض
والى براعة اغاني الهادي الجبل
كان محمود محمودا في تناوله للاشياء
فحبب الحياة للشباب وانقذهم من ضياع الانقاذ

بلاهي عليك يا منعم هل اخبرتني
اين كان ياسر عرمان في التسعينات؟
واين كان الحزب الشيوعي؟
واين كانت المثقفين
بل واين كان الفنانين الذين يطربونك؟

يا وجدي يا اخوي كمان انت ما تكبر اللفة شديد كدة حاسب شوية ....
لا حولتننننننننننننننننننننن ياقول ناصر
معقول محمود عمل دا كله ونحن ماعارفين ...
يازول التسعينات القريبة دا كنا كلنا حضورا وشهودا وفي نص المعمعة
ولم يكن محمود بيننا
محمود شنو كمان ...
كان هناك مصطفى وهو المعادل الموضوعي للترابي وتطرف الجبهة الاسلامية في تلكم الايام ...
كان هنالك حميد ...والقدال ...وعاطف خيري ...
والموصلي ووردي
وعركي
محمود شنو كمان العمل وعمل ...
كنا وقتها في مراحل الطلب مازلنا هل لك ان تصدق ان اجتماعات اللجان السياسية
للطلاب المعارضيين تستمر 24 ساعة متتالية
وما ان تنتهي حتى تعود وتنعقد مرة اخرى
وقد كان هنالك حوالي 25 الف طالب سوداني في الجامعات المصرية فتامل
كنا نعمل طوال الساعات لانجاز العمل السياسي اليومي
ولم يكن محمود بيننا ....
انا لا اذكر ذلك من باب الامتنان على الشعب ولا على روح النضال
ولكن احقاقا للحق كان هنالك مئات الطلاب من الطلائع تتقدم الصفوف لفضح زيف الكيزان وجبروت دولتهم
ولم يكن بيننا للاسف لامحمود ولا ظله ...
ولم ننهار كما الشعب
وصمد جل الطلاب
وواصل بعضهم النضال ومنهم من استشهد في سبيل الوطن
وما زال جلهم يناضل هنا وهناك
وبرضك محمود ليس بيننا ...
محمود شنو كمان البسويلو راس وقعر قدر دا ...
قال محمود قال ...
اما اين ياسر عرمان والبقية
كانوا
ومازالوا
في مقدمة الصفوف لنيل الحقوق كلها للشعب من ياسر
حتى خضر
ومن عركي حتى خيري

طبت يا جميل