مصر (لا) أخت بلادي (لا) شقيقة

[فتحي مسعد حنفي]

انت القال ليك منو ياهاني مصر قالت هي أخت بلادك ولا قالت شقيقتا ولا دايرا تكون؟؟
ياخ أنا ما فاهم ليه الناس بتتناسي ان مصر في كل الأزمنة البتقول عليها بوابة لدخول الأتراك والانجليز كانت مصر مستعمرة..الأتراك جكموها وحكموا دول في أوروبا لغابة ما اتهزموا في بيلا هورا بالقرب من براغ وبعد داك تحول الحكم العثماني لي حكم مملوكي في مصر في عهد محمد علي باشا..
تعرف المرة الوحيدة المصر حاربت فيها السودان كانت في الحملة الانتقامية من المك نمر والباقي كلو كان شغل انجليز صولو..
حتجي تقول لي حلفا حأقول ليك حاسب طلعت فريد وحكومة عبود وحلايب أرض سودانية مافي شك لكن ياخ القبائل السودانية العايشة فيها وأقصد العبابدة والبشارية اختاروا يكونوا مصريين وحقو تحاسبم هم..
هناك الكثير من الساسة السودانيين ومنهم محمد ابراهيم نقد والصادق المهدي بقولو حلايب أرض مصرية تعيش فيها قبائل سودانية..يللا ياخوي شوف الصادق المهدي اللسة حي وحاسبو علي كلامو..
بعدين بالمرة وريني في كم طبيب وكم مهندس وكم محامي درسوا واتخرجوا في مصر وكم مدرسة كانت في السودان تابعة للبعثة التعليمية المصرية..
ياخي حكومة الانقاذ قبل كدا فرضت جمارك علي الكتب التعليمية الكانت المدارس المصرية بتصرفا بالمجان للطلاب السودانيين وبرضو حضرتك تقول لا أخت بلادي ولا شقيقة